Arauak

• Kirolariak ekitaldia bi hankak lurrean dituela hasiko du.
• Ekitaldiaren denbora ofiziala bi minutukoa izango da. Denboraz kanpo, kirolariak beste altxaldi bat egingo du, berdinketa egonez gero erabili ahal izateko. Altxaldi horretako denbora ere neurtuko da.
• Marka, bi minutuan egindako altxaldiek adieraziko dute.
• Kirolariak, fardoak erortzean hartzen duen abiadura erabil dezake ondoren berriz altxatzeko.
• Kirolariaren oinak ezin izango dira polearen perpendikularreko 3 metroko erradiotik atera.
• Altxaldi bat baliozkoa izan dadin, fardoak lurra jo beharko du, eta sokaren korapiloak polea. Altxaldia korapiloak polea jotzean izango da baliozkoa.
• Soka eskuetatik libre pasako da. Eskuak garbi egon beharko dute eta kirolariak ezin izango du gorputzeko beste atalik erabili.
• Polearen euskarria zurruna izango da, polea balantzaka hasi ez dadin (ez goitik behera, ez ezker-eskuin).

Fardoaren eta lanabesen ezaugarriak

• Lehiaketetarako fardoak 45 kilo izan beharko ditu. Hauek izango dira neurriak:
• Altuera: Gutxienezkoa 50 zentimetro / Gehienezkoa 60 zentimetro.
• Luzera: Gutxienezkoa 80 zentimetro / Gehienezkoa 90 zentimetro.
• Zabalera: Gutxienezkoa 45 zentimetro / Gehienezkoa 55 zentimetro.
• Soka, korapiloaren goiko aldetik hasita, 7 metroko bidea egiteko eran jarriko da polea (15 zentimetro gorabehera). Polearen kanpoaldeko diametroa 300 milimetrotakoa izango da gehienez eta barnealdekoa 200 milimetrotakoa gutxienez.
• Sokaren gutxieneko diametroa 30 milimetrotakoa izango da eta gehienezkoa 35 milimetrotakoa.
• Emakumeen lehiaketetan fardoak edo antzekoak 30 kiloko pisua izan beharko du. Polea, 5 metroko bidea egiteko eran jarri beharko da. Ekitaldiaren denbora ofiziala 2 minututakoa izango da.